Reglanan di kas

Bo por tuma kontakto si bo ke papia riba algu. Esaki por trata di kiko ku ta! Nos ta haña ta importante sí ku nos ta trata otro nèchi i respetuoso. P’esei nos ta puntra bo pa mantené bo mes na algun regla si bo tuma kontakto ku nos:

Rèspèt pa otro

Meskos ku bo mester hasi esei na skol i na kas tambe, nos ta papia respetuoso ku otro. No ta pèrmití zundramentu. Si esaki sosodé tòg nos ta puntra bo pa kalma bo mes i pa tuma kontakto ku nos atrobe na un momentu mas despues. Si esaki sosodé mas frekuentemente, e ora ei lástimamente nos mester blòkia bo number.

Mantené e liña okupá sin rason

Nos ta komprondé ku por ta fasinante pa yama òf chat. Nos no ta hañ’é un problema si bo purb’é un bia pa tuma kontakto ku nos. Loke nos no ta aprobá ta hasimentu di wega via e chat òf telefòn. Bo ta tene e liña di telefòn òf chat okupá na e momento ei, miéntras ku un otro hende sí tin mester di e kontakto ku un di nos boluntarionan. Pues sea respetuoso no solamente ku nos boluntarionan pero tambe ku otro mucha.