en vervolgens "zet op beginscherm"Preguntanan hopi hasí
E chat, foro i telefòn ta disponibel pa tur mucha, hóbennan i adolesente na Kòrsou te ku 25 aña di edat. Bo por tuma kontakto ku un di nos boluntarionan si bo tin un pregunta òf problema, ke informashon òf konseho òf gewoon ke kompartí algu ku nos. Por trata di tur kos! Nos t’ei si bo tin mester di nos. Sin prehuisio i di forma anónimo.
Bo por tuma kontakto di forma grátis ku nos via e chat, foro òf yamada na 918. Abo mes por skohe kua bo ta sinti bo mas kómodo kuné. Tur forma ku bo skohe pa drenta den kontakto ku nos, lo ta anónimo.
Si bo tuma kontakto ku nos bo ta haña un di nos boluntarionan pa papia kuné. Nos boluntarionan ta entrená pa sa kon pa skucha bo i duna bo konseho di mihó forma. Nos boluntarionan ta haña ku ta importante pa bo ta sinti bo kómodo.
Si bo tin mester di mas yudansa, nos por den konsulta pone bo den kontakto ku e persona òf e organisashon apropiá ku por yuda bo mas aleu.
Semper ku bo tuma kontakto ku nos ta di forma anónimo. Nos ta puntra si nos por nota bo nòmber, pero si preferiblemente bo no ke esei, e ora ei esei no ta problema. E kòmbersashon ta konfidensial i solamente abo i e boluntario sa di e kòmbersashon.
Un foro ta un plataforma online kaminda bo por papia di forma anónimo di kiko ku ta ku kompañeronan di edat. Bo por hasi un pregunta, kompartí un eksperensia òf reakshoná riba otronan. Kisas bo pregunta i kontesta ya ta pará den e foro kaba.
Ehèmpel di tópikonan riba e foro por ta: tentamentu, situashon na kas, emoshonnan, miembronan di famia, sèn, separashon/divorsio, relashon i salubridat. Bo tin un pregunta òf eksperensia tokante un otro situashon? No ta problema, bo por gewoon kompartí esei! Riba e foro bo por papia tokante kiko ku ta.
Stichting Kinderbescherming Curaçao semper ta buska boluntarionan pa 918 i boluntarionan eksterno manera pa hasi kolekshonnan i pa eventonan. Nos boluntarionan pa 918 ta haña un entrenamentu promé ku ta konsistí di modulenan divergente. Pa e kurso nos ta apliká un deber di presensia di 100%.
Bo ke reforsá nos tim komo boluntario òf ke risibí mas informashon tokante esaki? E ora ei tuma kontakto via info@kinderbeschermingcuracao.org.
Semper nos ta buskando mucha, hóbennan i adolesente te ku 25 aña di edat pa e panel di hóbennan, ku ta reuní un bia kada tres luna pa papia ku nos tokante tópikonan manera social media, tabúnan, problemanan serka mucha i hóbennan. Bo tin interes den esaki? E ora ei yena bo nòmber i e-mail aki, e ora ei rápidamente nos lo manda bo mas informashon.
Bo pregunta no ta pará aden? Tuma kontakto ku nos e ora ei via e chat.